Konseho di minister a bai di akuerdo ku e areglo transitorio di sirkulashon di persona pa Islanan BES

Konseho di minister di Hulanda a aprobá e proposishon di minister Hirsch Ballin di Hustisia i sekretario di estado Bijleveld di Asuntunan Interno i Relashonnan di Reino, ku ta konserní un areglo transitorio ku ta regla entrada i atmishon di hulandesnan europeo na Islanan BES (Boneiru, Sint-Eustatius i Saba). E areglo transitorio ta stipulá ku, te na momento di introdukshon di un Lei di Reino ku ta konserní sirkulashon di persona pa Islanan BES, ta mantené e régimen eksistente di entrada i atmishon di hulandesnan europeo na Islanan BES.

Na momento ku formalmente a fiha i ehekutá e reformanan estatal den Reino, Boneiru, Sint-Eustatius i Saba lo bira parti di e organisashon polítiko hulandes komo entidatnan públiko. E or’ei Kòrsou i Sint-Maarten ta bira, meskos ku Aruba ta kaba, paisnan apart den Reino Hulandes. Ta desmantelá e aktual pais Antianan Hulandes. En konekshon ku e reformanan estatal a papia di introdukshon di un areglo uniforme pa entrada i atmishon di tur hulandes pa tur e partinan di Reino. Lo fiha esei den un Lei di Reino ku ta konserní sirkulashon di persona. Punto di salida di e lei di reino akí lo ta ku pa tur hulandes entrada i atmishon na e diferente partinan di Reino, en prinsipio, mester ta liber i mester ta suheto na ménos kondishon restriktivo posibel.

Tanten un Lei di Reino ku ta konserní sirkulashon di persona no drenta na vigor, entrada i atmishon di hulandesnan europeo na Islanan BES, mester regla e asuntu akí provishonalmente otro kaminda den lei o den otro sorto di areglo - komo un medida transitorio - pa evitá ku ningun kaminda e asuntu akí no ta reglá.

No opstante, ta konsiderá indeseabel pa den e medida transitorio en kuestion ya kaba unilateralmente, pa un parti limitá di Reino, esta Islanan BES, introdusí un areglo a traves di lokual ta regla introduskon di un Lei di Reino ku ta konserní sirkulashon di persona pa loke ta entrada i atmishon na Islanan BES di tur hulandes. Prueba es ku den e kaso ei, en prinsipio, tur hulandes lo tin entrada i atmishon liber na Islanan BES, miéntras ku e otro (futuro) paisnan, (ainda) no konosé entrada i atmishon liber. Esei lo no konkordá ku e resiprosidat ku ta aspirá den un Lei di Reino ku ta konserní sirkulashon di persona, esta e régimen di entrada i atmishon liber pa tur hulandes, ku lo ta vigente pa tur e paisnan di Reino. P’esei a opta pa por lo pronto mantené e reglanan eksistente.

Ta manda e areglo transitorio den un nota di modifikashon di e proposishon di lei, esta e Lei di atmishon na Islanan BES i ekspulshon, ku ya a entregá na Tweede Kamer. E proposishon di lei en kuestion ta regla entrada i atmishon di estranhero na Islanan BES i, despues ku inkorporá e areglo transitotio en kuestion, tambe entrada i atmishon di tur hulandes na Islanan BES.