10-10-10: un komienso nobo pa islanan di Antia hulandes

For di djadumingu 10 di òktober Kòrsou i St. Maarten ta pais nobo den Reino. Boneiru, Saba i Statia awor ta munisipio ‘spesial’ di Hulanda. Pais Antia Hulandes no ta eksistí mas.

Na Willemstad, Kòrsou mei anochi, djadumingu mainta seis or ora hulandes, a baha bandera antiano. Prínsipe Willem-Alexander i prinsesa Máxima a presensia e seremonia na Plaza Brion. Gabinete hulandes tabata representá pa sekretario di estado Bijleveld (Relashonnan den Reino) i minister Van Middelkoop (Defensa). Na St. Maarten tambe tabatin un seremonia ofisial. Minister Hirsch Ballin (Hustisia i Asuntunan Interior ) a representá gabinete hulandes aya.

Sekretario di estado Bijleveld a enfatisá den su diskurso durante e festividatnan na Plaza Brion ku e kambionan estatal ta nifiká un komienso nobo pa e islanan. Un komienso nobo, kaminda bienestar di e poblashon ta bini na promé lugá. 'Nos a buska e forma- i reglanan adekuá pa un gobernashon konfiabel, i a dediká masha atenshon na loke pa hopi hende ta e preokupashon de mas grandi: seguridat i protekshon di lei, riba kua tur siudadano di Reino tin derecho. Eseinan tabata e kondishonnan ku nos tabatin den nos mente tempu ku a fórmula e relashonnan nobo den Reino, pero mas ainda: e relashonnan denter di e paisnan nobo. Nos meta semper tabata krea un situashon ku lo hasi posibel, pa kada habitante sòru pa su mes i pa su próhimo. Pa perkurá pa muchanan haña bon enseñansa i pa nan ta fo’i peliger; pa tur hende por traha na un futuro.