Impulso sosial ekonómiko pa islanan di Hulanda Karibense

E gobièrnu hulandes a diskutí ku gobièrnunan di Bonaire, Sint Eustatius i Saba tokante un kantidat di inisiativa pa drecha e situashon sosial ekonómiko riba e islanan. Den sierto kaso esaki ta konserní problemanan ku ta surpasá e forsa propio.

Saba
Saba

Dos aña pasá e islanan den Karibe a bai forma parti di Hulanda. Den e temporada ei a implementá hopi mehorashon riba e islanan, manera enseñansa i kuido médiko. E ministerio di Asuntunan Sosial i Labor a laga hasi un investigashon na komienso di e aña aki tokante pobresa den Hulanda Karibense. For di esaki a sali na kla ku e situashon di e personanan ku ta mas abou den e komunidat, ainda tin mester di mas mehorashon. E gobièrnu di e islanan ta e promé gobièrnu responsabel pa maneho di pobresa.

Pa por asistí den esaki tambe for di Reino, gobièrnu hulandes a tuma e siguiente desishonnan:

  • E ònderstant speshal ta keda ekspandé, pa asina por hasi mas uso di esaki, prinsipalmente pa ku e gastunan pa artíkulonan di skol. E pago pa personanan ku ta inkapas pa traha i ku ta den ònderstant, ta keda oumentá ku 50% kompará ku e nivel aktual.
  • Un parti di e gastunan di provishon di utilidat a konsekuensia di desbentahanan relashoná ku tamaño di e islanan di Hulanda Karibense, ta bai kai bou di Hulanda Europeo. Tambe ta bin supervishon independiente. Di e manera aki ta limitá e peso di e gastunan a konsekuensia di e tarifanan ku ta subi pa siudadanonan i kompanianan na Hulanda Karibense. E partimentu di gastunan di provishon di utilidat ya tabata usual na Hulanda Europeo, i awor pues ta bálido den henter Hulanda, inkluso e islanan di Hulanda Karibense. Ta aspirá pa realisá esaki pa 1 di yanüari 2014 pa medio di lei. Pa e aña di transishon 2013, e ministernan di EL&I i I&M ta duna un aporte finansiero pa dim e oumento den tarifa.
  • Lo promové empleo pa medio di aplikamentu di un konsepto di ‘social return’ serka e proyektonan di konstrukshon di Reino na Hulanda Karibense. Ku esaki ta oumentá e impakto sosial di e proyektonan. Un ehèmpel di esaki ta e introdukshon di sitionan di konstrukshon pa alumnonan.
  • For di Reino ta hasi invershonnan èkstra den krèsh/akohida (despues di skol) na Hulanda Karibense.
  • Den kuadro di kasi US$ 5 mion di ganashi èkstra na entrada di impuesto na Hulanda Karibense riba 2011, a palabrá un pakete di medidanan ku e ministerio di Finansa, ku di un banda ta mehorá e forsa di kompra i di otro banda ta sigui stimulá ekonomia riba e islanan. E pakete ta kontené medidanan ku ta baha e vastgoedbelasting, ta baha akseinsnan riba kombustibel i ta oumentá e eksonerashon di belasting pa artíkulonan di promé nesesidat.
  • Ta krea un asina yamá ‘E-team’ pa kada isla di Hulanda Karibense. Esaki ta un relashon di kolaborashon entre gobièrnu i empresarionan riba e islanan, pa finalmente sigui stimulá desaroyo ekonómiko.

For di 8 te ku 12 di òktober e gobièrnunan di e islanan ta na Hulanda pa e konsulta semi anual ku diferente mandatario i departamentu di Den Haag. Algun otro palabrashon ku a keda hasí durante e asina yamá siman di Hulanda Karibense (“Caribisch Nederland-week”):

  • Huntu ku e minister di OCW a firma e plannan di alohamentu di enseñansa pa kada un di e tres islanan. E plannan aki ta sòru pa mehorashon di tur edifisio di skol na Hulanda Karibense.
  • Ta sigui drecha e aeropuerto riba kada isla di Hulanda Karibense.