Den Siman di Hulanda Karibense a dediká atenshon na diferensiashon

Den e programa di mas aña di e islanan Boneiru i Saba nan a yega na akuerdo ku gobièrnu hulandes tokante, entre otro, kombatimentu di pobresa, derecho di mucha i desaroyo ekonómiko. Minister Plasterk di Asuntunan Interno i Relashonnan di Reino (BZK) a kumbiní esei ku e delegashonnan di e islanan durante e siman di Hulanda Karibense ku a tuma lugá e siman akí.

Atenshon individual

E aña akí, durante e siman di Hulanda Karibense, a keda demostrá klaramente ku mester duna mas atenshon individual na kada isla. Den e programa di mas aña a tene kuenta ku esei. E ta enserá tambe ku Sint Eustatius no por a firma e programa. E isla ta partisipá sí na e siman di Hulanda Karibense, pero a pon'é bou di supervishon di Reino debí na e défisitnan supstansial riba su presupuesto. Asina Sint Eustatius kuminsá un trayekto di mehorashon, lo bolbe trata e programa di mas aña ku e isla.

Enfoke riba tereno sosial, ekonomia i infrastruktura

Despues di e invershonnan di gobièrnu Hulandes den último añanan riba tereno di kuido, enseñansa, gobernashon i infrastruktura, a bira tempu pa intensivá e maneho riba tereno di kombatimentu di pobresa, derecho di mucha i desaroyo ekonómiko. Den e programa di mas aña ya ta dediká atenshon inisial na e terenonan en kuestion. Aspektonan importante di esei ta por ehèmpel:

  • BZK ta pone na 2015 i 2016 anualmente e siguiente fondonan disponibel pa desaroyo ekonómiko: 495.000 dòler pa Boneiru i 180.000 dòler pa Saba.
  • Ministerio di Asuntunan Ekonómiko ta duna insentivo na entrepeneurship mediante 100.000 euro ku e Ministerio ta pone na disposishon di e Kámaranan di Komèrsio i Industria.
  • Pa problemanan sosio-ekonómiko, BZK ta pone na 2015 i 2016 anualmente e siguiente sumanan disponibel: 1.650.000 dòler pa Boneiru i 600.000 dòler pa Saba. Además ta invertí den krèsh, akohida di mucha i deporte.
  • Pa refuerso di gobernashon di e islanan, BZK ta pone anualmente 1,6 mion dòler disponibel.
  • Entrante 1 di yanüari 2016 lo introdusí plaka pa yu (kinderbijslag) na Hulanda Karibense (semper i kuando parlamento aprob'é). Pa plaka pa yu a reservá 900.000 dòler.
  • Tin investigashon andando pa mira kon mehorá e sistema di seguridat sosial.
  • E sekretario di estado di Asuntunan Sosial i di Empleo (SZW) ta konsiderando e posibilidat pa oumentá suèldo mínimo i ku esei tambe uitkeringnan, entrante 1 di yanüari 2016. Un ke otro lo sosodé a base di sifranan di Ofisina Sentral di Estadístika (CBS). E sifranan ta motibu pa oumentá suèldo mínimo na Saba ku 6.5 porshento i na Sint Eustatius ku 4 porshento. Pa Boneiru e estadístika di entrada no ta duna motibu pa un oumento. Aunke sí ta indeksá sùeldo mínimo anualmente.
  • E sekretario di estado di SZW ta konsiderando tambe un pakete komplementario struktural pa tur e islanan di 300.000 euro. Despues di konsultá ku e islanan por uza e fondonan en kuestion, por ehèmpel, pa plaka pa yu, Seguro General di Behes (AOV) i/o ònderstant partikular (bijzondere bijstand).
  • SZW ta subi e límite di entrada pa e bijzondere onderstand te na e nivel di suèldo mínimo, di moda ku mas hende por benefisiá di dje.
  • Pa duna un empuhe na mehorashon di derecho di mucha na Hulanda Karibense ta pone 3,3 mion dòler disponibel.
  • Ministerio di Infrastruktura i Medio Ambiente (I&M) ta invertí den proyektonan di infrastruktura. Pa Boneiru ta trata di atenshon na barionan i na haf di Kralendijk i pa Saba karetera- i haf. En total tin 21 mion euro presupuestá.
  • Además I&M ta invertí 20 mion i piku di euro den aeropuertonan pa añanan 2015 i 2016.

Mantenshon di fondo BES

Finalmente a kumbiní ku pa resultadonan di e komishon di evaluashon Spies lo tene kuenta ku resultadonan di e investigashon tokante altura di e di bon (vrije uitkering) di e fondo BES. Den promé mitar di aña 2016 lo tuma un desishon definitivo riba un ke otro. En espera di e desishon definitivo ta indeksá pa inflashon e di bon (vrije uitkering) pa 2015, loke ta enserá un oumento struktural di en total 800.000 dòler.