Akuerdo riba problemátika di integridat Sint Maarten
Sint Maarten i Hulanda a yega na un akuerdo riba e problemátika di integridat na Sint Maarten: e isla ta haña un kamara independiente di integridat. Ministernan Dennis Richardson (di Hustisia di Sint Maarten) i Ronald Plasterk (di Asuntunan Interno i Relashonnan di Reino di Hulanda) a firma e protokòl djasabra dia 23 di mei, den kua e palabrashonnan ta stipulá.
Tambe a hasi palabrashonnan riba e yudansa pa fortifikashon di mantenshon di lei na Sint Maarten, pa fortifiká kombatimentu di entre otro violensia, atrako i kontrabanda di hende. Tantu Richardson komo Plasterk ta bisa ku nan ta satisfecho ku e paisnan huntu a yega na e akuerdo importante aki.
Ku institushon di e kamara di integridat ta duna ehekushon na e rekomendashonnan di e investigashonnan tokante integridat ku a tene aña pasá. E kamara aki ta haña autoridatnan independiente pa dunamentu di konseho i hasimentu di rekomendashonnan. Tambe e kamara por hasi investigashon i hasi denunsia. Ta bai ankra e kamara di integridat den un Landsverordening, i e ta raportá tantu na Gobièrnu i na Parlamento di Sint Maarten i tambe na Konseho di Minister di Reino.
Fortifikashon di asistensia huridiko ta tuma luga tanto serka kuerpo polisial Sint Maarten, Landsrecherche, Recherchesamenwerkingsteam i tambe na Ministerio Publiko i Marechaussee Real. E fortifikashon aki ta dirigí speshalmente riba kombatimentu di ‘high impact crimes’ (krimen di impakto haltu), kriminalidat ku ta surpasá límite i ku ta debilitá, kontrabanda di hende i kontrabanda di merkansía.