Koenders: Huntu ku paisnan Karibense duna kontenido na relashonnan eksterior.

“Komo minister di Relashonnan Eksterior pa henter Reino, ami ta sostené e interèsnan di tur pais di Reino. Huntu nos ta duna kontenido na nos relashonnan eksterior. P’esei ta importante pa mi mantené kontakto intensivo ku e paisnan Karibense di Reino.” Esaki ta loke minister Koenders a bisa na Kòrsou, despues di e Koninkrijksoverleg Buitenlandse Betrekkingen (Konsulta di Relashonnan Eksterior di Reino) ku Minister Presidèntnan di Aruba, Kòrsou i Sint Maarten. 

Koninkrijksoverleg Buitenlandse Betrekkingen (KOBB) met de minister Koeders en de ministers-president van Aruba, Curaçao en Sint Maarten op 5 mei 2015.
Minister Koenders a bisa na Kòrsou, despues di e Koninkrijksoverleg Buitenlandse Betrekkingen (Konsulta di Relashonnan Eksterior di Reino) ku Minister Presidèntnan di Aruba, Kòrsou i Sint Maarten.

“E konsulta di Reino aki ta e momentu den aña pa repasá ku e tres minister presidèntnan e temanan mas importante riba tereno di relashonnan eksterior”, segun e minister. “Union den maneho eksterior ta esensial pa atende interèsnan di Reino, inkluso esnan di e paisnan.”

E minister a bisa ku e lo para fuerte internashonalmente pa ku interèsnan di e partinan Karibense di Reino. El a enfatisá ku partisipashon den e tereno internashonal ta bai den man ku derecho- i debenan. “Internashonalmente por prosedé kontra Reino pa obligashonnan di tratado, bon gobernashon i derechonan humano”, segun e minister.

Den kuadro di harmonisashon di e maneho di visa Karibense, e kuater paisnan a kumbiní ku otro pa pa entrante dia 1 di juli 2015 duna dispensashon di visa pa Colombia, valido pa Kòrsou i Sint Maarten, antisipando e posibel dispensashon pa e teritorio Schengen. Lo evaluá e desishon aki na yüli 2016. Pa Aruba i Hulanda Karibense lo otorgá e dispensashon di visa pa Colombia, asina ku e dispensashon di visa drenta na vigor pa tur dos pais pa e teritorio Schengen. Lo evaluá e dispensashon di visa di Colombia pa Aruba i Hulanda Karibense un aña despues ku e dispensashon di visa pa Aruba i Hulanda Karibense a drenta na vigor.

Durante e deliberashonnan tambe a trata e desaroyonan den region. Koenders a yama e aserkamentu entre Cuba i Estadonan Uní di Merka históriko. El a subraya e importansha di e proseso di reformashon ku Cuba a kuminsá riba tereno politiko i ekonómiko. “Esaki tambe ta ofresé oportunidatnan. Pa motibu di serkanía tin pa e Paisnan oportunidatnan interesante pa mas koperashon riba tereno di komersio, energia, siensia médiko i derechonan humano.” Dia 7 di mei minister Koenders lo bishita Cuba.

Ta natural ku a papia tambe riba e desaroyonan na Venezuela, e pais bisiña mas grandi di Reino. “Bon besindat ta e base di e relashon entre Reino i Venezuela”, segun Koenders.

Aruba, Kòrsou i Sint Maarten tin kada un, nan autoridat outónomo pa promoshon komersial. E minister a bisa ku embahadanan Hulandès, konsuladonan i representantenan permanente ta na disposishon di tur e paisnan di Reino: “Gobièrnunan, empresanan i siuidadanonan di Aruba, Kòrsou i Sint Maarten semper por aserká e ‘postennet’ pa asistí na ehekushon di nan ambishonnan ekonómiko. Tambe por uni na mishonnan komersial. Ta bon pa observá ku esaki ta sosodé mas i mas, por ehèmpel relashoná ku Panama, Colombia i tambe ku Cuba.”

Pa motibu ku e paisnan Karibense ta forma parti di Reino, nan no ta bini na konsiderashon pa mayoría di e fondonan di desaroyo. Pero komo estadonan chikítu di isla (SIDS – Small Island Developing States), nan si tin un problemátika specífiko di desaroyo. Minister Koenders a bisa ku mundialmente Reino ta reconosé e posishon speshal i circunstancianan di estadonan chikito di isla. “Asina, na luna di september, Reino a partisipá na e konferensia di SIDS na Samoa, ku un delegashon fuerte, liderá ekselentemente pa minister presidènt Eman”, segun Koenders. El a bisa ku Reino ta esforsá su mes den e negosashonnan tokante Post-2015 Agenda di Metanan Duradero di Desaroyo di Organisashon di Nashonnan Uní pa por yega na elaborashon di e sirkunstansianan speshal di e islanan chikítu aki den e metanan.

Den koneshon ku Organisashon di Nashonnan Uní, e minister a señala ku Reino Hulandès ta spera di por obtené un asiento den Konseho di Seguridat di Nashonnan Uní na 2017. “Esaki ta enfátikamente un kandidatura amplio di Reino. E kuater paisnan di Reino Hulandès ta kore kampaña huntu pa bira miembro di Konseho di Seguridat di Nashonnan Uní. Pa e motibu ei tambe nos tin e lema: ‘Kingdom of the Netherlands, One Kingdom – Four Countries; European and Caribbean’ (Reino Hulandès - Un Reino – Kuater Pais; Europa i Karibe).”

Na final Koenders a gradisí minister presidènt Asjes pa su resepshon kaluroso na Kòrsou. El a felisit’é ku presidensia di OCTA (Overseas Countries and Territories Association). “Mi ta kontèntu ku e rol aktivo di Kòrsou den e relashonnan ku Union Europeo. E prioridatnan di e presidensia Kurasoleño tabata bon skohí; un mihó kooperashon den region i ku Union Europeo.” Na Kòrsou e minister a papia tambe cu Gobernador George-Wout, ku minister Palm (Desaroyo Económiko) i ku Presidente di Vereniging Bedrijfsleven Curaçao (Asosashon di Komersiantenan na Kòrsou).

Pa konkluí su bishita na Kòrsou, minister Koenders a bishitá e base di marina, for di unda tambe Hulanda ta apoya operashonnan di kombatimentu di droga den teritorio di Karibe. Minister Koenders: “Mi ta impresioná di e esfuerso di wardakosta i otronan, pa kombatí via e operashonnan aki, kontrabanda di droga i pa duna un kontribushon na siguridat i stabilidat regional.”

Kòrsou tabata e di dos parada di Koenders durante un biahe na e paisnan Karibense di Reino – Aruba, Kòrsou, Sint Maarten – i e paisnan Latino Americano Cuba, Guatemala i Mexico.

Minister Koenders bezoekt de marinebasis op Curacao
Pa konkluí su bishita na Kòrsou, minister Koenders a bishitá e base di marina