Ningun buraku den penshun pa studiantenan di Hulanda Karibense

Studiantenan di Bonèiru, Sint Eustatius i Saba (BES), kendenan ta bai studia na Hulanda, den futuro ta sigui akumulá un benefisio pa dia nan bira grandi. Konseho di minister a bai di akuerdo ku un proposishon di Sekretario di Estado Klijnsma di Asuntunan Soshal i Oportunidad di Trabou, kende ta enkargá ku esaki. 

Esun ku sali for di Hulanda Karibense pa bai studia na Hulanda Europeo, no ta bai keda mas bou di e seguro general di behes (AOV) di BES. Pues, durante e tempu ei e studiante no ta akumulá un AOV di BES. Solamente si banda di studia, e ta traha na Hulanda tambe, anto e persona aki por sigui akumulá pa e provishon pa dia e bira grandi.

E gabinete kier evita ku studiantenan, durante e tempu ku nan ta permanesé na Hulanda, ta haña un buraku den penshun. P’esei, dia 1 di juli 2015, un desishon ta drenta na vigor ku ta regla ku e studiantenan di tur manera ta sigui akumulá AOV di BES si nan ta studia na Hulanda.

E regla aki ta valido tambe pa e otro banda. Hendenan ku for di Hulanda ta bai studia na Bonèiru, Sint Eustatius i Saba, tampoko lo no por akumulá AOV di BES mas. Nan ta keda sigurá si pa AOW.