Sint Maarten mester pone presupuesto na òrdu

Konseho di Minister di Reino a disidí di duna Sint Maarten un instrukshon pa pone presupuesto 2015 i e kalkulashonnan di mas aña na òrdu. Di e forma akí Konseho di Reino ta duna oido i sigui konseho di e Kolegio di Supervishon Finansiero Kòrsou i Sint Maarten (Cft).

Sint Maarten mester tuma medida pa eliminá e atrasonan di pago na balor di por lo ménos ANG 189 mion i pa kompensá e deficitnan di añanan anterior di por lo ménos ANG 60 mion den e periodo di 2015 te i ku 2018. E pais mester elaborá realístikamente tambe e gastunan di penshun i kuido riba presupuesto 2015 i tuma medida pa hasi e sistema di kuido i di previshon pa behes sostenibel pa futuro.

Mester stipulá e medidanan akí den un reforma presupuestario ku mester ta fihá promé ku dia 31 di òktober 2015. Kolegio di Supervishon Finansiero lo husga si e reforma presupuestario i e medidanan proponé ta sufisiente. Pa un sistema di kuido i di previshon pa behes ta sostenibel, Sint Maarten ta haña tempu te fin di 2016 pa implementá e medidanan ku ta nesesario.

Konseho di Reino ta kere ku dunamentu di e instrukshon akí ta nesesario awor. Sint Maarten a haña sufisiente tempu pa tuma e medidanan akí, pero kada biaha, no opstante e promesanan hasí, a keda sin hasi esaki. E instrukshon tin komo meta, evitá ku problemanan finansiero ta krese bira astronómiko pa e isla di Sint Maarten.