Supervishon finansiero Kòrsou i Sint Maarten ta keda na vigor

E obligashonnan ku ta surgi for di e Lei di Reino di Supervishon Finansiero Kòrsou i Sint Maarten (Rft) tokante finansa públiko ta keda na vigor pa Kòrsou i Sint Maarten. Esaki Konseho di Minister di Reino a disidí, riba proposishon di minister Plasterk di Asuntunan Interno i Relashonnan di Reino.

Konseho di Minister a tuma e desishon akí siguiendo Konseho di e komishon di evaluashon di Lei di Reino di Supervishon Finansiero Kòrsou i Sint Maarten. Nan ta konsiderá ku niun di e dos paisnan no a kumpli ku e normanan kompletamente ni independientemente tampoko den añanan 2012, 2013 i2014. E komishon di evaluashon ta skirbi:

"Tantu Kòrsou komo Sint Maarten a logra mehorá nan atministrashon finansiero i nan ta rekuperando e atraso den formulashon i stipulashon di e kuentanan anual. Sin embargo, ku esaki ainda nan no a yega na e punto ku lo por konkluí ku tur dos pais, ku nan propio institushonnan i nan propio prosedimentu gubernamental i supervishon, ta den kondishon pa yega na un atministrashon finansiero sano i struktural. Banda di esaki mester sigui kòrta e atraso den e kuentanan anual mas ainda (tantu pa loke ta tempu komo pa loke ta e stipulashon nesesario)."

E Kolegio di Supervishon Finansiero ta preskribí ku Konseho di Reino, despues di sinku aña ku e lei a drenta na vigor (10-10-2010), ta disidí si (un di) e paisnan no tin mester di kumpli ku nan obligashonnan mas. Den esaki e ta sigui e Konseho di e komishon di evaluashon di Kolegio di Supervishon Finansiero, di kua por desviá únikamente den forma hustifiká. Konseho di Minister di Reino no ta mira ningun motibu pa desviá di e Konseho.

E komishon di evaluashon di Kolegio di Supervishon Finansiero ta konsistí di e siguiente personanan: señor Ron Gomes Casseres (presidente), señor Reuben Essed (miembro pa Sint Maarten), señor Edelmiro Seferina (miembro pa Kòrsou ) i señor Marcel van Gastel (miembro pa Hulanda).