Notisia

E kapitulo aki tin 2 tema (tópiko)

Gabinete ta reakshoná riba rapòrt Spies: mehorashonnan visibel, posibilidat pa mas mehorashon

Ta bini un mínimo sosial, derivá for di e suèldu mínimo legal na Boneiru, Saba i Sint Eustatius.E ònderstant por krese bai na esaki den stapnan. Tambe lo bini medidanan pa stimulá invershon i empleo. Ku esakinan e gabinete ta reakshoná riba e konklushonnan di e komishon Spies.

Komishon Spies ta konkluí ku tin bon adelanto i mehorashon visibel den kuido médiko i den enseñansa. Na mes momentu komishon Spies ta pone notanan marginal krítiko i ta konstatá ku hopi habitante ta desapuntá ku e nivel di bida ku a bai atras. P’esei e gabinete ta pone algun medida dirigí i spesífiko pa kombatí pobresa. Esakinan ta adishonal riba e afspraknan i akuerdonan ku ta eksistí kaba entre Hulanda i kada un di tres islanan Boneiru, Sint Eustatius i Saba.

E gabinete ta konsiente di sirkunstansianan lokal di e habitantenan di Hulanda Karibense i ta skohe pa un empeño dirigí riba mehorashon i pa duna un impulso na e desaroyo sosial ekonómiko. Pa mehorá e standart di bida di gruponan vulnerabel e gabinete ke stipulá un mínimo sosial , derivá for di e suèldu mínimo legal. E ònderstant por krese bai na esaki den stapnan.  Banda di mehorashon di e forsa di kompra, e struktura ekonómiko tambe ta keda reforsá. E ministerio di Asuntunan Ekonómiko ta pone konosementu i ekspertisio disponibel pa protekshon di konsumidó i kompetensia. Tambe e islanan ta haña mas tempu pa tuma leinan Hulandes ofer i algun lei ‘Antiano’ ta keda na vigor. Den diálogo ku e gobernashon públiko lokal, lo reforsá e organisashon atministrativo pa asina yega na un mihó servisio na habitantenan i komersio.

E ministerio di Asuntunan Interno i Relashonnan di Reino ta empeñá pa mehorá e merkado di bibienda di e isla. Esaki mester resultá den konstrukshon di mas kas pa hür i kompra. Tambe e gabinete ta ofresé ayudo pa ku akohida (despues di skol) riba e islanan i ta dispuesto, manera ya ta kustumber na Saba i Sint Eustatius, pa tuma e responsabilidat pa kuido pa hóben na Boneiru, ofer.

Mehorashon di forsa di kompra no ta solamente asuntu di gabinete so. E ta eksihí un esfuerso konhunto di gobièrnunan, kompanianan, institushonnan i habitantenan na ámbos banda di e oséano.

Ku e medidanan aki e gabinete ta reakshoná riba e konklushonnan di komishon Spies. E komishon aki a investigá kon e struktura estatal nobo, 5 aña despues di introdukshon di esaki, ta wòrdu eksperensia na Boneiru, Sint Eustatius i Saba. Riba 10-10-10 e tres islanan a bira parti di Hulanda komo entidat públiko. Kòrsou i Sint Maarten a haña e status di paisnan outónomo den Reino.