Bai directamente na kontenido

Lockdown parsial ta kontinuá

Notisia | 01-12-2020 | 15:04

Medidanan ta keda nesesario pa protehá otro.

E kantidat di infekshon di corona ta baha. Esaki ta bon notisia. Nos ta tene nos mes bon na e medidanan, i esei tin efekto. Pero nos no ta kla ahinda. P’esei ta importante pa nos kontinuá e lockdown parsial. Nos ta sigui limitá e kantidat di momento di kontakto i e moveshonnan di biahe. Nos ta sigui apliká e reglanan básiko. I nos ta trata di yuda otro pasa den e temporada difísil aki.

Entre otro museo, teatro, pisina i parke di rekreashon despues di a sera pa dos siman, por habri atrobe i nos por hasi deporte atrobe den lès di grupo. Pa dia hende por risibí maksimalmente tres persona na kas atrobe, i por ta pafó den grupo di maksimalmente kuater persona. Na mes momento e lockdown parsial ta keda na vigor. Te ainda nos ta konsehá pa no biaha pa eksterior te medio yanüari, a ménos ku esaki ta estriktamente nesesario. Pa limitá e kantidat di bia ku hende ta bini den kontakto ku otro, ta keda prohibí eventonan i tin un seramentu kompleto di hóreka.

Tene bo na e reglanan básiko

Mantenshon di e reglanan básiko ta keda krusial pa baha e kantidat di infekshon. Es ku tin keho, tambe si nan ta leve, ta keda kas i ta laga tèst su mes mas pronto posibel. Es ku ta infektá, ta apelá na ayudo di otronan pa hasi kompra i otro kos, pa asina e persona infektá por keda kas. Tur hende ta mantené un meter i mei di distansia i es ku ta na un kaminda ku tin hopi hende, ta bandona e sitio. Tin un konseho urgente pa bisti tapaboka no médiko den e área públiko paden.

Medidanan di sosten i atenshon pa otro

E medidanan aki tin un impakto grandi riba komunidat i ekonomia. P’esei gabinete ta sostené empresario, hende ku ta traha i hende ku ta buska trabou ku medida di sosten. I tin atenshon pa hende ku ta sinti nan mes solitario òf ku ta haña nan mes den problema finansiero. Pero ta importante tambe pa nos sigui tene nos mes na e medidanan. Pa nos mes keda salú i pa tene otronan salú. I pa perkurá pa nos haña bista riba mas libertat den nos bida diario, tanten ku e vírùs di corona no a bai -  ta huntu ku famia i amigu, hasi deporte huntu i bai evento òf un restorant huntu.

Perspektiva

Kuminsamentu di desèmber gabinete ta disidí si por adaptá e medidanan. Esei ta nifiká ku por selebrá San Nikolas, pero nos ta tene distansia di otro hende i ta risibí maksimalmente tres persona na kas. Pero ku poko kreatividat kisas por haña solushon pa selebrá nochi di regalo, por ehèmpel den grupo chikí distribuí riba vários dia òf via un konekshon digital. Banda di esaki San Nikolas ta hasi bon di hasi su kompranan na tempu i preferiblemente e so i kaminda ta posibel hasi kompra lokalmente òf online.

Gabinete no a disidí ahinda ki medida ta na vigor rònt di dianan di Pasku di Nasementu i di bispu di Aña Nobo. Pero mas mihó nos tene nos na e medidanan awor, mas grandi e chèns riba adaptashon di e medidanan.

Tèst

For di promé di desèmber por tèst un hende tambe si e no tin keho, pero sí a kore riesgo riba un infekshon. Ke men si e app di CoronaMelder (app ku ta avisá ku tin Corona) mèldu tokante un riesgo di infekshon, òf si un hende sali dilanti den e investigashon di fuente i kontakto. For di e momento ei, e persona ei ta bai den karentena. Despues di sinku dia e por laga tèst su mes i den kaso di un tèst negativo por kanselá e karentena.

Lei temporario medidanan COVID-19

Riba promé di desèmber e lei temporario medidanan COVID-19 (tijdelijke wet maatregelen COVID-19 ) ta drenta na vigor. E ora ei lo tin un deber di bisti tapaboka na vigor den áreanan públiko paden manera pakus, museo, restorant i teatro. Pronto gabinete lo komuniká mas tokante di esaki.

E medidanan

Grupo:

  • Na kas bo ta risibí maksimalmente 3 persona pa dia. Bo ta risibí maksimalmente un grupo di hende pa dia.
  • Pafó di kas bo por forma un grupo ku maksimalmente 4 persona di diferente kas.
  • Den área paden kaminda hende ta sinta un kantidat máksimo di 30 persona ta na vigor.

Bida diario:

  • Biaha mas poko posibel
  • Traha na kas, a ménos ku berdaderamente no por otro.
  • Tur hende di 13 aña di edat òf mas ta bisti tapaboka den área públiko paden i den transporte públiko.
  • Den enseñansa sekundario (VO), enseñansa profeshonal sekundario (MBO) i enseñansa superior (HO) tur hende ta bisti tapaboka pafó di lès.
  • Tur lugá kaminda por bai kome i bebe ta será. Take-out sí ta keda posibel.
    • Ku eksepshon di:
  1. Hotèl pa wéspet ku ta drumi einan
  2. Agensia funerario
  3. Aeropuerto despues di chekeo di seguridat
  4. Kantina di kompania
  5. Lugá di kome i bebe den instansia di kuido pa pashènt i bishitante di pashènt
  6. Lugá di kome i bebe na sitio pa pasa dia organisá pa grupo vulnerabel
     
  • Sitio ku un funshon kombiná ta sera e parti di hóreka
  • Pakus di komersio minorista ta sera pa mas tarda  8 ’or di anochi.
     
  1. Pakus ku ta bende espesialmente komestibel sí por keda habrí mas lat.
     
  • Entre 8 ’or di anochi i 7 ’or di mainta no ta bende ni entregá alkohòl mas.
  • No ta permití pa entre 8 ’or di anochi i 7 ’or di mainta tin poseshon di alkohòl òf usa esaki den espasio públiko.
  • Evento ta prohibí, ku eksepshon di:
     
  1. Marshe (e marshenan semanal normal)
  2. Bolsa i kongreso
  3. Sine, teatro, sala di konsierto, museo, ets.
  4. Torneo di deportista den instansia di deporte profeshonal, torneo den Divishon di Honor i Promé Divishon di futbòl i persona te 18 aña di edat ku ta hasi deporte na nan klup.
  5. Demonstrashon, enkuentro i reunion manera ta deskribí den e lei manifestashon públiko
     
  • Den komersio minorista ta keda importante pa kumpli estriktamente ku protokòl. Si bini muchu hende òf si no kumpli ku e reglanan básiko por sera (un parti di) un sitio. E mantenshon lo bira mas skèrpi.
  • Den parke zoológiko, museo, biblioteka i otro sitio kaminda ku fluho di hende ta na vigor, bishita mester tuma lugá a base di un reservashon pa periodo. Esaki no ta konta pa komersio minorista òf marshe di kos (marshe normal semanal).
  • Prohibishon pa kanta den grupo, ku eksepshon di:
     
  1. Kantante profeshonal
  2. Mucha te ku 12 aña
  3. Kanta komo parti di profesamentu di un religion òf kerensia
  4. Kanta komo parti di un demonstrashon
     
  • Na entiero por tin maksimalmente 100 persona presente.

Deporte ta posibel ku limitashon:

  • Tur hende for di 18 aña ta permití di hasi deporte solamente na distansia di 1.5 meter. Ta permití di hasi deporte individualmente òf den tim ku no mas ku 4 persona. No ta permití torneo. Ta hasi eksepshon pa:
     
  1. Deportista profeshonal ku státus den sitio indiká (manera Papendal)
  2. Futbolista (inkluso sobrá personal den “bubbel”) di Divishon di Honor i Promé divishon.
     
  • Pa mucha te 18 aña (deporte den tim i torneo ku tim di e propio klup ta permití).
  • Kantina di deporte, ducha i lugá pa kambia paña ta será.
  • No tin públiko na deporte.

Biaha:

Pa biaha na Hulanda ta konta:

  • Biaha mas poko posibel
  • Bo ta bai di vakashon tòg? Keda na bo adrès di vakashon mas tantu posibel.
  • Limitá salimentu i evitá lugá ku hopi hende.

Pa biahe pa eksterior ta konta: