Un atministrashon insular i gobièrnu di Reino Hulandes ta goberná Bonaire, Sint-Eustatius i Saba.
E islanan ta munisipio (gemeente) partikular di Hulanda. Nan ta konosí tambe komo munisipio den Karibe Hulandes. E diferensia prinsipal ku un munisipio na Hulanda ta, ku e islanan akí di Karibe no ta pertenesé na un provinsia.
Kolegio Ehekutivo (Bestuurscollege) ta enkargá ku e asuntunan di gobernashon diario di e islanan. Nan ta ehekutá e desishonnan di Konseho Insular (Eilandsraad). Kolegio Ehekutivo ta tuma desishon e mes tambe, manera duna pèrmit di konstrukshon òf sera un kontrakt ku un kontratista. Den esaki Kolegio Ehekutivo por konta ku sosten di su ámtenarnan. Sekretario general di e isla ta hefe di e organisashon ofisial akí di ámtenar.
Kolegio Ehekutivo ta goberná i Konseho Insular ta kontrolá. E ámtenarnan ta ehekutá e trabou i e desishonnan. Kolegio Ehekutivo ta representá e siudadano.
Mas informashon tokante gobernashon di e islanan por lesa riba wèpsait di Bonaire, Sint-Eustatius i Saba:
- Bestuurscollege di Bonaire
- Gobièrnu di Sint-Eustatius
- Gobièrnu di Saba
Servisio di Reino den Karibe Hulandes ta realisá su tareanan na e 3 islanan.
Komisario di gobièrnu na Sint Eustatius
Dia 7 di febrüari di 2018 a remplasá gobièrnu di e isla ku un Komisario di gobièrnu. Esaki a sosodé pasobra Konseho Insular, Kolegio Ehekutivo i Gezaghèber no tabata ehekutá nan tareanan debidamente. Na 2020 ta skohe un konseho insular nobo. Komisario di gobièrnu ta mantené sinembargo un funshon den gobiernu insular te na momentu ku su presensia - pasobra gobiernu insular ta funshoná bon - bira innesesario.
E Komisario di Gobièrnu ta papia regularmente ku e siudadanonan i e empresanan di St. Eustatius. El a krea un Konseho Asesor Sosial, ku por asesor’é. E ta tene tambe ora di konsulta pa e siudadanonan di e isla.
Representante di Reino
E Representante di Reino pa e munisipionan den Karibe: Bonaire, Sint Eustatius i Saba ta e vínkulo entre gobièrnu di reino (na Den Haag) i e 3 munisipionan den Hulanda Karibense.
E Representante di Reino tin su ofisina na Boneiru. E ta pa e diverso ministernan na Hulanda nan ‘oido i nan wowo’ i e ta mantené e Minister di Asuntunan Interno i Relashonnan den Reino (BZK) informá.