Gabinete a pone € 30 mion èkstra disponibel pa invertí den Bonaire, Saba i Sint Eustatius. Ku esaki gabinete ke stimulá ekonomia na Karibe Hulandes. Por ehèmpel mehorando e infrastruktura i redusiendo pobresa.
Proyektonan pa kada isla
E plaka ta pa e proyektonan akí:
Saba
- Konstruí i desaroyá haf;
- Desaroyá sektor agríkola.
Bonaire
- Suministrá kombustibel di forma sostenibel;
- Stimulá konstrukshon di bibienda sosial;
- Traha plan pa desaroyo di agrikultura;
- Mehorá e lugá kaminda ta mata bestia pa konsumo;
- Stimulá intermediashon laboral via un sentro laboral;
- Mehorá e konekshon entre edukashon i merkado laboral.
Sint Eustatius
- Na Sint Eustatius ta bai dil ku e problemanan relashoná ku eroshon di suela.
Proyektonan pa start na Bonaire
E invershonnan ta tuma lugá ora por papia di un bon gobernashon i un un maneho finansiero sano. Sekretario di Estado di Ministerio di Asuntunan Interno i Relashonnan den reino (BZK) a palabrá ku Konseho Ehekutivo di Bonaire kon lo por mehorá atministrashon i maneho, i nan e fiha esaki den un akuerdo atministrativo. Por ehèmpel, a logra akuerdo riba bon gobernashon, bon maneho finansiero i kon fortalesé e poder di ehekushon di e munisipio partikular Bonaire. A sera akuerdo tambe tokante temanan konsiderá importante tantu pa Bonaire komo pa Reino. Esaki ta inkluí entre otro redukshon di pobresa, bibienda sosial, karetera i akohida di mucha.