Dia 6 di sèptèmber di 2017, orkan Irma a raza riba e islanan Sint Maarten, Saba i Sint Eustatius. Prinsipalmente Sint Maarten a sufrí mayor daño di Irma. Hopi kas i e infrastruktura a keda destruí. Hulanda a duna yudansa di emergensia te dia le di desèmber di 2017. Despues Hulanda a kuminsá ku su kontribushon na rekonstrukshon di Sint Maarten. E pais Sint Maarten mes ta responsabel pa e rekonstrukshon.
Papel di Hulanda den e rekonstrukshon
Hulanda a destiná € 550 mion pa rekonstrukshon di Sint Maarten. Hulanda a pone 2 kondishon na e yudansa akí:
- Ku ta establesé un kámara di integridat
- Ku ta mehorá vigilansia na frontera
Parti di e plaka ta pa sosten direkto. Banko Mundial ta manehá mayor parti di e kantidat (te un máksimo € 470 mion). Pa esaki a krea un fondo (Trustfund). Ta paga e suma na kuota.
Na final di aña 2017 Hulanda a duna mesora €7 mion pa proyektonan ku lo por a start rápidamente i por a duna resultado inmediato pa e poblashon. A yama esakinan ‘proyekto di rekuperashon tempran’. Por ehèmpel:
- Drechamentu di kas pa hende di edat avansá
- Restourashon di instalashonnan pa personanan ku enfermedat króniko i esnan inkapasitá
- Yudansa pa mucha- i hóbennan
Tur e proyektonan di rekuperashon tempran por mira den e bista general.
Papel di Banko Mundial den e rekonstrukshon
Banko Mundial ta manehá parti di e kontribushon hulandes (te na un máksimo di € 470 mion) via un fondo di maneho (Trustfund). Banko Mundial ta yuda Sint Maarten elaborá un plan di rekonstrukshon yamá National Recovery and Resilience Plan (NRRP) (Plan Nashonal di Rekuperashon i Resistensia).
Ta usa e fondo pa krea proyekto. Esakinan mester kumpli ku e rekisitonan di Banko Mundial. E rekisitonan akí ta garantisá ku ta gasta e plaka di un manera hustu.
Ta lòs e kantidat di € 470 mion na kuota. Ya a destiná € 262 mion pa sierto proyektonan, por ehèmpel pa:
- Hasi e isla mas resistente pa orkan;
- Drecha e tuberianan di awa i elektrisidat;
- Drecha e aeropuerto;
- Realisá programa di formashon i sosten pa hendenan ku a keda sin trabou pa motibu di e orkan;
- Drecha i hasi e hospital mas grandi;
- Monta un forma sostenibel pa deshasí di shushi;
- Duna empresanan chikí i mediano asistensia finansiero.