Kada isla un status nobo

For di dia 10 di òktober 2010 Reino Hulandes ta konsistí di 4 pais: Hulanda, Aruba, Kòrsou i Sint Maarten. Antia Hulandes no ta eksistí mas, pa motibu ku tur isla tin un status nobo.

Kòrsou i Sint Maarten: paisnan nobo denter di Reino. Ku un “status aparte” denter di Reino, Kòrsou i Sint Maarten ta paisnan outónomo. E paisnan tin un gobernashon independiente i nan no ta dependiente di Hulanda mas. Por lo pronto Hulanda ta sostené e paisnan nobo den funshonamentu di organisashon nobo di e paisnan. A prepará un plan di maneho pa e institushonnan di gobièrnu, ku riba e fecha transitorio di 10-10-10 te ainda no ta funshoná sufisientemente. Den prinsipio e plannan aki tin un plaso di valides di máksimo 2 aña. Ehekushon di e plannan na aña 2011 ta primordial pa e paisnan nobo.

Boneiru, Sint Eustatius i Saba: munisipionan nobo di Hulanda. Boneiru, Sint Eustatius i Saba tabata kier un laso mas profundo ku Hulanda. Awor nan ta pertenesé komo “munisipionan partikular” na Hulanda.

Aruba: Aruba i Hulanda a akordá un agènda mutuo, ku kua, durante añanan ku ta bini, nan ta ehekutá mehoransa den kumplimentu di leinan, ambiente di biba di sentro di siudat i di legislashon. Probablemente lo finalisá e investigashon riba e situashon di gobernashon na Aruba na kuminsamentu di aña 2011. A base di resultado di e investigashon aki lo evaluá si lo tin motibu pa tuma medida mas detayá i riba kua nivel esaki mester sosodé.