Régimen nobo di impuesto

For di dia 10 di òktober 2010 Boneiru, Saba i Sint Eustatius ta munisipionan partikular di Hulanda i parti di sistema gubernamental Hulandes. Esaki ta nifiká ku ofisialmente Hulanda ta responsabel pa kobramentu di impuesto riba e islanan. 

P’esei dia 1 di yanüari 2011 a introdusí un sistema fiskal nobo ku siudadanonan i empresanan por adaptá fásilmente. Ta bini medidanan genériko mas tantu posibel, loke ta hasi ku e sistema di impuesto ta bira mas fásil. Ademas tarifanan ta baha i gobièrnu lo introdusí un sierto kantidat limitá di impuesto. Esaki ta hasi ku e sistema aki di impuesto ta desviá for di e sistema ku ta válido na Hulanda.

Mas impuesto indirekto

Banda di esaki Gobièrnu kier introdusí mas impuesto indirekto, na lugá di impuesto direkto. Si un pais ta kobra hopi impuesto direkto (por ehèmpel riba impuesto di entrada, esta inkomstenbelasting), anto empresanan ta keda ku ménos plaka di nan ganashi. Trahadónan ku mester entrega mas impuesto di salario, esta loonbelasting, lo bai eksigí un entrada brutu mas haltu. Esaki ta un peso riba ekonomia.

Si parti e meskla di impuesto den un otro forma, anto ta sobra mas plaka pa e empresanan i pa e konsumidónan, pa nan invertí den ekonomia. Nan mester paga mas impuesto riba volúmen di benta, esta omzetbelasting, pa merkansia ku nan kumpra. Durante último añanan mas pais ta kambia impuesto direkto pa impuesto indirekto. Na Hulanda por ehèmpel e impuesto di salario tabata e fuente di entrada mas grandi. Awor esaki ta e impuesto riba volúmen di benta, esta e BTW.