Statüt di Reino

E kapitulo aki tin 2 tema (tópiko)

Konstitushon ta supordiná na Statüt di Reino Hulandes, ku ta regla relashon estatal entre e paisnan Hulanda, Aruba, Kòrsou i Sint-Maarten. Den Statüt ta pará ku e paisnan en kuestion ta atendé nan propio asuntunan independientemente i ku konhuntamente nan ta atendé asuntunan di reino. Ademas Statüt ta duna regla pa kooperashon mutuo, asistensia, konsulta i organisashon polítiko di e paisnan. 

A promulgá Statüt na 1954. For di e momento ei e paisnan di Reino tin posishon ekivalente i nan ta atendé independientemente nan propio asuntunan. Por kambia Statüt solamente si tur e paisnan di Reino ta di akuerdo. Konstitushon Hulandes i Areglonan di Estado di Aruba, Kòrsou i Sint-Maarten ta supordiná na Statüt.